| تبليغات | X |
|
خهونباز
|
||
|
بهیادی نهنووسراوهکانم خهون دهبینم |
ههموو دنیا بێگانهیهکی تێدا نییه.
"کورسومیکیو"
مامۆستایهک له شاگردهکانی پرسی:
چۆن دهتوانن بزانن شهو تهواو بووه و تاو ههڵاتووه؟
یهکیان کوتی: بێتوو له دوورڕا سهگێک و مهڕێک لێک بکهینهوه.
ئهوی دییان وتی:
کاتێک دهنکێک ههنجیر له زهیتوونێک جیا کهینهوه.
مامۆستا سهری ڕاوهشاند.
پرسییان: ئهی چۆن دهتوانین گهورهمان؟
کوتی: ئهو کاتهی بێگانهیهک نزیک بێتهوه و تۆ پێت وابێ براکهته؛ شهو کۆتایی هاتووه و ڕۆژ دهرکهوتووه.
1- عهلی فردهوسی دۆستی سادقی چووبهک و بنهماڵهی دهگێڕێتهوه: زۆرجار له حهسارخهڵوهتی پشتهوهی ماڵی چووبهک دادهنیشتین و دایمه باس باسی ئێران بوو و خوێندنهوهی حافز. چاولێکردن له چووبهک له ئێرانی نزیکتر دهکردینهوه. به تایبهت ئاشقی بووشێهر بوو. چووبهک وهسییهتی کردبوو کاتێ مرد بیسووتێنن و خۆڵهمێشهکهی بڕێژنه سهر ئاوی زهریای گهوره.. دهڵێ به گاڵتهوه دایمه دهیکوت: "نازانم کاتێ ئێسقانم دهسووتێنن بۆنی بووشێهری لێ دێ یان نا؟"
2- گۆیا چووبهک زۆربهی نووسراوهکانی ئاخری عومری و به تایبهت بیرهوهرییه کۆنهکانی خۆی سووتاندووه. دهڵێن لهگهڵ شاملوو نێوان ناخۆشیان ههبووه بهڵام بۆ ڕێزگرتنهکهی له زانکۆی بێرکلی ئامریکا، شاملوو لهگهڵ ئایدا دهچێ. سبحهینێی ئهوشهوه،چووبهک چوونکێ نهیتوانیوه بۆ کۆڕهکه بچێت؛ ئهو جهماعهته بانگهێشتنی ماڵهکهی دهکات. دهڵێن شاملوو بۆ خۆی چووه و چووبهک بانگی نهکردبوو. لهوهی دۆستان دهیانههوێ حافز به دهنگی شاملوو بخوێندرێتهوه. دهگهڕێن له حافزی شاملوو و وهگیریان ناکهوێ و چووبهک ههر هیچ ناڵێ. ئاخرهکهی یهکێک لێی دهپرسێ: حافزی شاملووت نییه؟ ئهو به تووڕهیییهوه دهڵێ: "حافزی قهزوێنی بخوێننهوه! جگه لهو، حافز خوێندنهوه له ڕووی حافزی ترهوه بێمانایه!" ههموو مات دهبن. چاو له شاملوو دهکهن. شاملووش به گهورهیییهوه دهڵێ:" حافزی قهزوێنی بێنن."
داخهکهم ئێستا هیچیان نهماون؛ یهکیان میوانی خاکه و یهکیان بۆته خۆڵهمێش...
۱-
کابرایهک ژنێکی خواست. پێش گوێستنهوهی، ژنهکه خرۆلکهی گرت و چاوێکی کهمبینا بوو. کابرا که ئهوهی دی، له پڕێکدا کوتی چاوم دێشێ و پاشان کوتی نابینم و کوێر بووم.
ژنهی گوێستهوه و بیستساڵی لهگهڵ بوو. کاتێ ژنهکهی مرد، کابرا چاوی ههڵێنا و دهیدی.
لێیان پرسی: ئهوه چ باسه؟
کوتی: خۆم له کوێری دابوو تا ژنهکهم خهمباری کهمبینایی خۆی نهبێ.
کوتیان، پێشکهوتهی تواو جوامێرانی!
۲-
حسێنی ئینتاکی که له شێخان بوو دهیکوت: سی و چهند کهس له موریدهکانم خڕ ببوونهوه و له نانێک زۆرترمان لهلا نهبوو. لهتوکوتیان کرد و چرایان کوژاندهوه تاکوو به کهم یان زۆر کێ لێی دهخوات، شهرم نهکات. چرا که ههڵکراوه نان ههر له جێی خۆی بوو و کهس لێی نهخواردبوو لهبهر ئهوی تر!
"نهقڵ له محهمهدی عهوفی"
لهو مانگه ڕهشهمهیهدا چاومان به دیداری سێ کتێبی تازهی نووسهرانی نێوئاشنا درهوشاوهتهوه. کهیفساز بووین به دیتنی حهولی دۆستانمان. شاگهشکه بووین به بینینی سیمای ڕووحی ساکاری ئهو ئازیزانه له شێوهی ڕهنگاوڕهنگی کتێبهکانیاندا. ئاواتی سهرکهوتنیان بۆ دهخوازین و ئهوهی که کتێبخانهی چیرۆکی کوردی به کتێبی به بایهخ ڕوو له گهشهو و گهورهبوونهوهیه، هۆی سهرفهرازییه. دهستخۆشی لهو نووسهره بهتوانایانه دهکهم.
تابووتی تهمهن
کۆچیرۆکی نووسهری هێژا بریا کاکهسووری بریتییه له دوازده چیرۆک. 153 لاپهرهیه. ڕووبهرگ و تهرحی کتێبهکه هی نووسهره. دوای "سیاسووت" و "سهفهرنامهی دۆزهخ" ئهمه سێههم کاری ئهوه. ڕهنگه له بازار کهم وهدهست کهوێ چونکێ ئهژماری پهنجا دانهیه- خۆزگه.وا نهبا- لای نووسهری "تابووتی تهمهن' ئهو باوهڕه ههیه که ڕهنگبێ خوێنهری چیرۆکی کوردی ههر ئهوهندهبێ! بریا زهینێکی داستانی ههیه و زۆر وردبینی نێو چیرۆکی له وێنهی دیتنی شاعیرێک دهچێ. ئهو چیرۆکنووسێکی به توانایه و بێگومان خوێندنهوه ئهو کۆچیرۆکه چێژی تایبهتی دهبێ.
پیاوێکی ڕیش خهنهیی
کۆمهڵه چیرۆکی نووسهری ئازیزعهزیزی مهحموودپووره. بریتییه له سیودوو چیرۆک. ڕوبهرگهکهی کاری کاک ئیدریس بههرامپووره. دهزگای" کۆڵهپشتی" چاپی کردووه. بیستدانهی ئهوچیرۆکانه له پێشدا لهو دیو له ژێر ناوی "فهرموون چایهکی گهرم" بڵاو بوونهتهوه بهڵام وهک زۆر کاری بێسهرهوبهره و بێسهمهری دهزگای بڵاوکردنهوهی "ئاراس" که ههر دهزانێ کتێب چاپ دهکا و ئهگهرهی دهستهودایرهی خۆیان نهبێ دهدردی سهگ به ڕیزمان و خاڵبهندییهکهی دهدهن و بڵاوی ناکهنهوه و وهستای جوانهمهرگکردنی کتێبن، ئهویش نهکهوتۆته دهست خوێنهر و نووسهری بهستهزمان دیسان، ئهمجار، لهم دیو تێکهڵ چهن چیرۆکی نوێتر بڵاوی کردۆتهوه. زۆر چیرۆکی تایبهتی تێدایه. زمانی نووسهر زمانێکی شاعیرانه و داستانی و مۆرکی خۆی پێوه دیاره. خوێندنهوه و دیاریدانی ئهم کتێبه لهو نهورۆزهدا کارێکی بهجێیه.
تۆقی عهزازیل
ئهمهیان ڕۆمانه! چهن له مێژ بوو چاوهڕوانی دیتنی ڕۆمانێک لهمدیو بووین. کاری سهید قادر هیدایهتییه. 173لاپهڕه. بڵاوکراوهی دهزگای چاپی "کۆڵهپشتی" و ڕووبهرگیش کاری کاک ئیدریسه. ڕووبهرگێکی تایبهت و شیک و به مانا؛ خوێنهروهره! سهید، پێش ئهوه نۆوێلێتی "دهنگی نوختهی" له فۆرم و شێوهیهکی تازهدا بڵاو کردبۆوه. ڕۆمانهکه باسی زۆر شتی قهدهغه دهکا له مهر ژیانی خانهقا. زمانێکی پڕگێڕانهوهی تهوسیفی تایبهت به کهشی ڕووداوهکانی نێو ڕۆمانهکه یان ئهو شتهی پێمان وایه لهو شوێنانه وای قسان پێدهکرێ. زۆر پرس و نهزهر و خوێندنهوه و لێکۆڵینهوه له پشت نووسینی ئهو ڕۆمانهدایه که لهگهڵ خوێندنهوهی بۆ خوێنهر ئاشکرا دهبێ. ئهوهندهی سوراغم کردووه شێوهی داستانی ئهمکاره، له زمانی کوردیدا کهمه و نووسینی دایمه ترس له گێڕانهوهیهکی لهگهڵ بووه. هیوادارم له داهاتوودا زۆری لهمهر بنووسرێ و بخوێندرێتهوه.
تهنیا وهتهنی نووسهر، دووکانی کتێبفرۆشییه.
ر. بۆلانیۆ
زۆر ئێوارێ که دێیه دهرێ نازانی چ بکهی؟ تێکهڵ ئهو حهشاماتهی نێو شهقام بی و ههر لهو سهری نهخۆشخانهی قهدیمهوه چاو له مۆد و دووکانان بڕی تا دهگهیه چواڕێی ئهسکهندهری و باس له ئهوه بکهی کێ دهوڵهمهند بووه و ئهوه چۆن وای لێ هات و دیتنی مانتۆی ژنان و قژی سهری گهورهکوڕان و بگهڕێیهوه تا ئیسکیپی و چاولێکردنی یهکدوو ڕۆزنامهی زهرد و جهدوهل و ڕاگرتنی تاکسییهک و بێتاقهتی. سهر له دووکانی یهکدوو دۆست بدهی و گاڵتهیهک و کورته ههواڵێکی یهکتر و بایبایهکی ئینگلیزی ودیسان بێ تاقهتی. خۆ بکهی به قاوهخانهدا و چایهکی پڕڕهنگ و بۆنی جگهره و قلیان و ههواڵی مردن و شایی و ههڵگیرانی ژنان و حیزی پیاوان و حهشیش و شیشه و ههمیسان بێتاقهتی. هێندێک کهلوپهلی ماڵ بکڕی و چاو به نێو دووکاناندا بگێڕی و قیمهتی شتی جوراوجۆر بپرسی و بڵێی چهن گرانه و شت بۆته قهباعهت و خودا خراپتری نهکا و توورهکهیهک بهدهستهوه بهرهو ماڵێ و ههمیسان بێتاقهتی. دهکرێ ئێوارێ ئاوا ببێته شهو. شهوێک پڕ له بێدهنگی و نیگای تلووزێن و هێندێک برێشکهی سۆر و خهوێکی نزیک له مردن.
چهن ساڵ لهوه پێش دهکرا ئێوارێ ئاوا نهبوا. لهسهر چوارڕێی شارهبانی، محهممهدی ئهحمهدی- ساماڵی شاعیر- به ئهوپهڕی دڵگهورهیییهوه کتێبفرۆشی "ڕۆژ"ی ههبوو. ئهو شوێنهی جهماوهری به نێو مۆدێڕنی شار، بێ ئهوهی بزانن ئاواتی دهیان کهس لهو دووکانهدا خهریکی سهمان، به بهریدا تێدهپهڕین. دووکانێک پڕ له نووسین و خوێندنهوه و چاویلکه لهچاوانی کهمپارهی کتێبخوێنی پڕئارهزووی کڕینی کتێب. له خهیاڵی مندا بیری مستهفای کوڕهچاکهی برای، له دووکهڵی جگهری پێش چاوهچکۆلهکانیهوه ههر دیاره: زۆری دڵ پێوه بوو له جیات ئهو ههموو قسهی نێو دووکان، وهک دووکانێکی کۆتاڵفرۆش پووڵ و پاره له دهخڵیاندا هاتبا و ڕۆیبا. بۆیه دایمه بیری لهوه دهکردهوه:"کشتوکاڵ چاکتره له کتێبفرۆشتن." محهممهد دهیزانی دهخڵی دووکان به ئاوات پڕ نابێ و دووکهڵی جگهرهی ئهو بیری لهو ڕۆژانه دهکردهوه که بژیوی ژیان کتێبفرۆشتنی پێ تهرک دهکات.
ئێوارانی ئهو دهم که دهچوویه دهرێ دهتزانی جێگایهک ههیه که بچی و بێتاقهت نهبی. جێگایهک ههیه که دهروونت سوکنایی پێ بێ. نێو کتێب و کتێبخوێن و شاعیر و نووسهر و دۆستهکانیان. دووکانێک پڕ له کاغهز و کۆپی و کتێب و پێنووس و دهفتهری یادگاری و خهیاڵاتی جۆراوجۆر. بێتاقهت نهدهبووین لهوێ. قسه دههات و دهچوو. ون دهبووی له مژی جگهره و بۆنی چایی جارجاره و دهبیندرایهوه. محهممهد قهت نێوچاوان گرژ نهدهبوو. گۆڤاره کوردییهکان لهوێ دهبیندران. زۆر گۆڤاری تایبهتیش دههات که پێنیشان هی وهک من نهدهدرا بهڵام ههواڵهکانیمان پێدهگهیشت. تامهزرۆ بووین بزانین چیمان له کوێدا بڵاو بۆتهوه. لهوهشدا ههمیشه دهستهیهک سهرتر بوون. کهمتریان دهنووسی و زۆرتریان لێ چاپ دهبوو. نووسراوهی ئهمدیو وئهودیوی کوردی دههاته کهشی کتێبفرۆشی ڕۆژهوه. زۆرجار میوانی ئهمبهرئهوبهرمان لهوێ دهدی که یهکی وهک من لهو ساڵانهوه ئیدی نهیدیون. زۆرجار هێنده باس له کهسایهتی هێندێک کهس دهکرا دهتکوت ههمیشه لهوێن: هاشم سراج و شێرزاد و ئهنوهر مهسیفی و کاک حوسێن و عهزیز و سهیدی ههواڵی و خالق و ئهمین و بێگهرد و فهرهاد شاکهڵی و رهزازی و هێمن و بهختیار و فهرهاد پیرباڵ و عهتای نههایی و ساڵحی سووزهنی و فهتاحخان و کاک ناسر و وهفای شاعیر و پهشێو و سهیدجهعفهر و کاک سمایلی کتێبدۆست و شێرکۆ و ڕهفیق سابیر و عهلی محهمهدزادهی بێدهنگ و یۆنس و ئازادی شاعیر و قادر و خهونهکانی خودا و گروپی خۆر و ئهنجوومهنیهکان و ههواڵانی ئهنجوومهن و ڕهسووڵ و فهوزێی شاعیر و ڕێبینی کوڕیان و خالق و کامیل و قادر و لهتیف ههڵمهت و سهلاحی مهنگوڕ و لاوانی وهک ئهمجهد و خهونه دزراوهکانی محهمهدی ڕهمهزانی و ئاواتهسیاسییهکانی جهواد و دهیانی کهسایهتی دیکهی نێو کتێبهکان ههواڵی ئهودهممن. له کتێبخانهی ڕۆژ ههمیشه تهمومژی کار و کار و کار بوو. ههموو کارمان دهکرد. دهماننووسی و دهمانخوێندهوه. بۆیه لهو ئێوارانهدا بێ تاقهت نهدهبووین. شتێکمان پێبوو که باسی بکهین. لێواولێوی ئهدهبیات دهبووین له دووکان و بهردووکانی محهممهد و وامان لێدههات که شهوانه بێنووسین خهومان لێنهدهکهوت. دووکانی محهممهد کانگای حهسانهوهی ڕووح بوو. زۆر شهڕی لێ ساز دهبوو و زۆر دیداری ئاشتیشی لێ خۆش دهبوو؛ گلهیی لهسهر گلهیی و باس و قسانی سهیر و سهمهره. بهڵام ههمووی له بهر ئهدهبیات و له تاوی نووسین و خوێندنهوه. ههرچهند ئهو کات محهممهد و دهیانی دیکهی وهک من دڵتهنگی نهبوونی پاره بووین بهڵام بێ تاقهت نهدهبووین. ئهگهر سرتهیهکمان بووبا دههاتینه بهر درگا یان بهر ویترینهکهی و یان لهقهراغ قاناوی شهقام دهمان کرده جهفهنگ. تهواوی ئهو ئێوارانه چاومان ههر له کتێب بوو. تێکهڵ کتێب دهبووین. زۆر شاکار نهناسراومان به یارمهتی یهکتر خوێندهوه. زۆر قسهی ئاشقانهمان لهسهر کتێب لهوێ گوێ لێبوو. محهممهد زۆرجار که لهو جهماعهته ماندوو دهبوو بۆخۆی به بیانووی جگهرهوه دههاته بهر دووکان و له بیری ئهوهدا "که باشه بۆ فڵانی و فڵانیش قهرز نادهنهو؟" ئاش بهتالی دهکرد. مستهفا کهم وا ههبوو سهنگهری دووکان بهر دات و تێکهڵمان بێ بهڵام ئهویش به دزییهوه و بهشی تهنیایی خۆی باشی دهخوێندهوه؛ وهک لهبیرم بێ ڕۆمانی "تهڕڵان"ی قهوامی پێش زۆرمان خوێندهوه. ناعیلاج بوو. ئهوهی هاتبا ئهو دووکانهوه له نهخۆشی خوێندنهوه نیزیک دهبۆوه. مستهفا وردهورده کتێبی باشتر دهناسی و چاکتریشی دهفرۆشت. بۆ وێنه ئهودهم توانی پڕۆست به من بفرۆشێ و ئهگهر ئهو نهبووا من قهت له کاتی سهربازی ڕفێقێکی وهک پڕۆستم نهدهبوو.
ئیستا دیسان ئێوارهیه و کتێبفرۆشی رۆژ ساڵههایه تهنانهت ناویشی نهماوه. من بێدهنگ بهلای چوارڕێی شارهبانیدا خوار دهبمهوه بهرهو ماڵێ و ههمیسان بێتاقهتی و بێتاقهتی...
ناسرهون ههست و خهیــــاڵ ئهی خۆزگه من دێـــــــوانه بام
خۆزگه دهســـت و پێــــــم لهناو زنجــــــــــیری بایهو وا نهبام
زولفی سهر شــــــــــانت عهزیزم کاتێ هاتی شــــــانهکهی
من گوتم سهد خۆزگه دهنــــــکی شانه بام و شــــــا نهبام
چارهنووسی تاپۆکان/ سولهیمان عهبدولڕهحیم زاده
دهگهڕێتهوه بۆ چارده پازده ساڵ لهوه پێش. خوێندکارێکی ساکاری زانکۆ بووم و بریای کاکهسووری شیعری پهریای شاملوو به کوردی دهدامێ و من دهمنووسییهوه بۆ ئهوهی بڵاوی کهینهوه. چاویلکه له چاوێکی کزی زۆرجار لهگهڵ بوو که تا ئیستا و ڕهنگه ههمیشهش بۆ من ههر کاکهیه و ههرامان لێ دهکرد کاک سولهیمان. زۆرجار که قسهیهکم دهپهڕاند، زانستی ئهو لهسهر باسهکه بایکۆتی دهکردم. بۆ ئاوا زۆر دهزانێ؟ وردهورده بۆم دهرکهوت له مێژه ئاشقه ئهدهبیاته و مامۆستایهک وهک کاک مستهفای بایهزیدحسهینی ئهدهبیاتی لهبهرچاو زۆر شیرین کردووه. پێم وابوو کهس به قهت من سادقی هیدایهتی خۆش ناوێ بهڵام ئهو زۆر چاکتری له من هیدایهت دهناسی و زۆرتریشی لێ خوێندبۆوه- ههرچهن شوکر بۆ یهزدان تا ئهو دهم س.گ.ل.ل هیدایهتی ههر نهدیبوو و من توانیم بۆ یهکجاریش بێ، یهک هیچ بم!- دوای ئهوه چهن جارێکیشی له ماڵی بریا و کاکه شا لهگهڵ دانیشتم تا وردهورده بوو به یاری غار. سهبارهت به مێژوو و سیاسهت و ڕوانین بۆ چیرۆک بۆچوونی جیاوازی ههبوو؛ زۆرجاریش تایبهت. لهبیرمه تۆوی گوڵهبهڕۆژهشی چاک دهترووکاند. له ماڵی کاک حسهینی شێربهگی بلیمهت کۆبوونهوهکان تایبهتی بوون. منی تامهزرۆ مهنگی ئهو ههموو کتێبهی ئهوان دهیان ناسی، ههر پیشم دهخواردهوه. یهکهمجار وشهی "تارمایی"م له کاک سولهیمان بیست. چهندهم پێخۆش بوو نێوی چیرۆکێک، تارمایی بێ! لهو دانیشتنانه هیوای تێدا بوو زۆری دهکوت و ڕهنگه زۆریشی زانیبا بهڵام بهکار نهدههات چونکێ به قسهی کاک سولهیمان نه بۆخۆی نه شتهکانی پراکتیزه نهبوون!! بهڵام لای من بۆچوونی کاک سولهیمان له زۆربهی دۆستان بهرچاوتر بوو. دایمه شهڕی زمان و ئیجازمان بوو له گهڵی. بهڵێی بۆ ئهو جهماعهته دهفهرموو بهڵام "سهگوهڕ و دۆنکیشۆت و پهپوولهپاییزه و زهرد" بێ ئهو زمانه نهدهبوونه چیرۆک؛ بۆیه گوێی بهکهس نهدا تا ڕێگای خۆی بدینێتهوه و ئاکامی دوای ساڵهها نووسین ببێته "چارهنووسی تاپۆکان". کتێبێک که ئهمڕۆ لهبهر دهستمه و شانازی پێوه دهکهم چونکێ ئازارهکانی نووسهرهکهی بۆ نووسین لام نامۆ نین. کتێبێکی لای من ئازیز چونکێ دهزانم دوای چهنده هاندهری دۆستان، لهدایک بووه. کاک سولهیمان بۆ کاری خۆی پاشای تهنبهڵانه دهنا دهبوو ئهو کتێبه زۆر لهوه پێش بێته دهرێ. ئهوانهی ئهو چیرۆکانه دهخوێننهوه دهبێ زۆر شتی باوی باڵای چیرۆک له بیر بهرنهوه تا چێژ له خوێندنهوهیان ببینن. دهزانم بۆی ههیه دووجاره و سێجاره چیرۆکهکان بخوێندرێنهوه و پاشان بگوترێ ئهرێ ئهوه دهڵێ چی؟ با پێتان بڵێم ئهگهرهیچیش نهڵێن ئهرخهیان بن دنیایهکی تازه له خهیاڵتاندا ساز دهکات. ئێوه ههمێشه نهنکێکتان له بیر دهمێنێ کاتی شتنی تهرمهکهی دهبێته پیاو یان ڕدێنێکتان دێته بهرچاو که شهوانه خۆشهویستی دادهپۆشێ. لهزۆر جێدا ئێرۆتیکێکی داستانی دهبینن که زۆر کهم له کورتهچیرۆکی لای ئێمهدا ئاوا مامۆستایانه بزری نێو وشهیه. جیهانی نووسینی کاک سولهیمان زۆر له شانۆ نزیکه بۆیه له لای من زۆر چیرۆکی بۆنی شانۆیان پێوه دیاره. ئهو شانۆ باش دهناسێ و خۆشیشی دهوێ بۆیه زۆر کهسایهتی نێو چیرۆکهکانی شانۆکارێکی بهتوانان.
وێڕای ئاواتی شادی و سهرکهوتن بۆ خۆی، پیرۆزبایی له کتێبخانهی کوردیش دهکهم.
له قهراغ گوڵی یاسهمهن،
له بن ئهو بهرده گهنجێکه...
"ئێستاڵکێر" فیلمی دیتنهوهی دنیایهکی دییه، فیلمی سهفهر بهرهو بهختهوهری و سهربهستی، بهرهو بهههشت؛ تهنانهت ئهگهر گولله و تۆپ ببارێ!
بهرهو دۆزینهوهی ئیمان له وهتاغی نێو جهنگهڵێکی بێبن، ئستاڵکێر مانا دهگرێت. کهسایهتییهکانی فیلمهکه، بۆ دیتنهوهی ژیانێکی نوێ و دنیایهکی تازهتر سنوور و سهباز و تێلدڕوو تێدهپهڕێنین. بهڵام پرسیار ئهوهیه پاش دیتنهوهی ئهو دنیایه کامهیان بهختهوهر دهبن یان ئیمانی کامهیان دهژێتهوه؟ ئایا چوونه نێو وهتاغی پێداچوونهوه به خۆماندا، ئارهزووهکانمان وهدهر دهخات؟
فیلمی "ئستاڵکێری تارکۆڤسکی" چیرۆکی پێداچوونهوهیه به دهروونی خۆماندا و گوێڕاگرتنه له ئارهزووهکان. وڵاتی نادیاری و ڕهنگی ئاواتهکان، ناهومێدهکان ڕادهکێشێ. ئستاڵکێر دهڵێ: بڵێی ڕهنگێکی تریش نهبێ؟!
دوو کهس: که یهکیان نوێنهری فیزیکه بۆ دیتنهوهی میتافیزیک- که له کۆتاییدا دهزانێ وهشوێن هیچ کهوتووه - و ئهوی دییان نووسهرێک که خۆدی نووسینی لێ ون بووه و بۆ ئهوه وهشوێن ئئستاڵکێر دهکهوێ که ببێته بلیمهتێک که ههرچی بنووسێ ببێته شاکار- له ئهنجامدا ئهویش دهزانێ که نووسینی وا بێکهڵکه- بهڕێنوێنی ڕێزانێک - ئئستاڵکێر- بهرهو کهشفی جیهانێکی نهدیده؛ بهرهو بهههشتێک بۆ دیتنهوهی ئیمان و مۆجیزات سهفهرێکی تایبهت تاقی دهکهنهوه.
ئستاڵکێر دهیههوێ ئهو دووانه له گهڵ جیهانی مانا و ئیمان ئاشت کاتهوه بهڵام مهخابن که گۆڕینی شێوازیش زۆرجار ڕێگا ئاشکرا ناکات. گێڕانهوهی ئئستاڵکێر به شوێن دنیایهکی تازهوه نییه بهڵکوو دهیههوێ وێڵی نێوان ئاو و ئاسمان و خاک چونیهتی بوون وهبیر بهێنێتهوه. لهتهواوی ئهو گهڕان به شوێن بهختهوهرییهدا، ناهومێدی و ونبوونی ئیمان وهک سهگێکی ڕهش له گهڵ ئئستاڵکێرههنگاو ههڵدێنێتهوه: [قهوزهی سهر ئاو دهبێته باڵنجی خهوبینهرێک که به شوێن زێڕی نێو ئاو دایه - حهرهکهی دووربین لهو کاتهدا که سوڕهنگ و قهرهپووڵ و فهنهر و ... وهک نهمادی دنیای ماددی دهوری پهیکهرهی پیاوچاکێکیان داوه، وهبیر بهێننهوه-]
نووسهری نێو فیلمی ئستاڵکێر وهک زۆر نووسهر له تاو هێرشی ڕهنج دهنووسێ؛ دهنووسێ تا له مهنی خۆی ڕزگاری بێ؛ بۆوهی بیسهلمێنێ به کاری شتێک دێ و مامۆستاش دهچیت تا دیوێک که نهمادی ئیمانه بڕووخێنێ چونکێ پێیوایه به کاری هیچ نایهت. تهنیا ئئستاڵکێره که وهک دهرهێنهر ناچێته وهتاغی ئاشتبوونهوه له گهڵ ئیمان بهڵام به هاتنی مۆجزاتی دوای نهداری ئیمانداره تا ههتاههتایه.
ئستاڵکێر دژ به شهر و وێرانی و سووتمان و تهکنۆلۆجییه که ڕۆژ به ڕۆژ گومان و ناهومێدی دهچێنێ و ئیمان بزر دهکات. ئهو دهزانێ دهروون له کهشی لێڵی ئهم دنیایهدا،هاسان نایهته ڕوو و دهیههوێ بڵێ له بیرمان بێ بۆ چی هاتووین و بۆچی نههاتووین. بهڵام پرسیاری سهرهتا ئهوهیه ئایا پرسیارێک ههیه بۆ هاتن؟ ئایا ئێمه له دنیای دوای قهوماندا، وێڵی مانای ژیان، ژیان لهبیر دههێنینهوه و هونهرو ئیمان فهرامۆش دهکهین؟
ئستاڵکێر به شوێن وڵاتێکی نادیاردا دهڕوا که تهکنۆلۆجی مۆدێرن ناتوانێ پێی بگا یان وێرانی کات و نوێنهرهکهشی وهک مامۆستای نێو فیلمهکه له کۆتاییدا ئهوهی بۆ دهردهکهوێ.
فیلم مۆسیقایهکی تایبهتی ههیه که من وهبیر فیلمی نۆستالێژیا دهخاتهوه و فیلمبهردارییهکی ههیه که تاریکی قهت لهبه ڕووناکی بهجێ ناهێڵێ: ههر وهک وردهورده کهشی ناهومێدی دهروونی کهسایهتییهکان وهدهر دهخات.
ئستاڵکێر ئاخرین فیلمێکه که تارکۆڤسکی له شۆڕهوی سازی کرد و به وتهی خۆی، بهشی خۆشهویستی وجوودی خۆیهتی.
ئستاڵکێر دهیههوێ بڵێ بهرێگاوهبوون گرینگتره له ئاکامی ڕیگا. ئهو دهڵێ وهتاغێک بۆ تهمای به تهماکان ههمیشه ههیه. دایمه بهههشتێک لهو بهر پردهکهوه، نادیارانه، دیاره. فیلم موکاشفهیهکه و ئستاڵکێر ههروهک له ڕۆمانی "گهڕان له قهڕاغ ڕێگا"ی برایانی ئێسترۆگاتسیدا – که فیلمهکه لهڕوویهوه ساز کراوه- ڕێنوێنه، لهم فیلمهشدا کهسێکه که ڕێگای نادیار و بهرهو بهختهوهری دهناسێ ههرچهن دهزانێ قهت پێی ناگات؛ ئهو به هیوای مۆجزاتێکه که نایهته ڕوو و دنیای لێڵی فیلم دهری دهخات که تهمایهکی ناتهواوه.
فەسڵی پازدە!
ئاخری فەسڵی پازدەش گەیشت و جودا لە ئاگادارییەکی دڵتەنگانە شتێکی لەگەڵ خۆی نەھێنا...
"تریسترامشەندی بەرگی دوو؛ فەسڵی 15؛ لاپەڕە 75۷"
سهبارهت به یۆنسی:
/ وت و وێژێک له گهڵ برایم ئاغا یۆنسی
هه
ر لهههوهڵهوه بهتهمای شتێک بقهومێ؛ ماڵێکی ئهشرافی و عهرزێکی نادیار له ژێر سێبهری مانگێکی ڕازداردا، چاوهڕوانن. دایمه چاوهکان ڕوو له ئاسمانن؛ دهبی شتێک بقهومێ. نادیاری پشت بهرینایی دڵڕفێنی بهرچاوی بینهر، لانگشاتی جهنگهڵێکه. ئێمه وهک بینهر ههر لهسهرهتاوه مهحتهلین خهونی دارستانێک که سێبهری دهریا وهک جیرانێکی ههمیشهیییهتی، له چاوهڕوانی قهومانێکی لێڵدا، بشێوێ.
چۆنیهتی ئاخربوونی دنیا، پرسیارێکی بهردهوامه بۆ ههموومان. بڵێی چۆن کۆتایی به ژیان بێ؟ دنیا چۆن وێران دهبێ؟ چهنده چاوهڕوانی مهرگ و نابووتی ئیزنی ههیه ژیانی ئاساییمان بشێوێنێ؟
"ملانکولیا"یلارێنس فۆنتڕیێر دوو بهشی بۆ گێڕانهوه ههیه: جاستین- کریستێن دانست- به شێوانی هزر و تێکهڵاوی مێشکی دایمه خهمباری، له شهوی بوکێنیدا، پشت له ههموو شتێک دهکات و چێژی دنیا و حهیای ئهدهب و ئهخلاقی ئاسایی - خۆشهویستی پڕلهدرۆی خوشکی که دهیههوێ له جیات دایکی ماخولیا و باوکی ههرزهیان بێ، و ههموو دۆستانی - بهجێ دێڵێ. بووکێک که بووکێنی خۆی دهدا به ناڕاستترین ئاشنای نێو شایییهکهی و زاوا وهک نامۆیهک چاو لێداکات و دهیڕهنجێنێ. مانهوه له نێو تهنیایی خۆیدا و لهژێر سێبهری چاوهڕوانی ئاسمان و پڕشنگی مانگدا، دهکاته جێگری ههموو چێژ و ئهو شادییانهی لهو شهوهدا دهیتوانی بهڕهوڕووی بێ. جاستین وهک ملانکولیا دهیههوێ دنیای خۆی و ئهوانی دی وێران کات.
ههموو فیلمهکه له ژوور و دهرێی ماڵێکدا دهقهومێ. بهڵام ئهو ماڵه له بهشی یهکهمدا، سهمبوولی دنیای بهرینی دهوڵهمهندان و ئهو شادییانهیه که دهکرێ چاوهڕوان بکرێن و به پێچهوانه له بهشی دووههمدا، زۆربهی لووکهیشێنهکان له حهولی چکۆله نیشاندانی ژیان و دنیا و دڵهخورپهی، قارهمانهکانی فیلمهکهدان. له بهشی دووههمدا "کلێر"- شاڕلۆت گزینبۆرگ- و بنهماڵهیهتی که ئاگای له نهخۆشی جاستین و ههروهها چاوهڕانی ئاخری دنیایه. لهو بهشه دایه که پرسیارهکان وردهورده قهڵافهت دهگرن: هیچ شوێنێک بۆ خۆشاردنهوه نییه، کاتێ قهومان به پیلانهوه ڕێگات پێدهگرێ.
ملانکولیا فیلمێکی نێئۆسهمبۆلیستییه؛ حهکایهتی سێبهره. سێبهری ههتاوێکی رهش له سهر ژیانی فهلسهفی ههموومان؛ سێبهری مهرگ لهسهر ههموو چێژهکانی ژیان.
له نێوان ههموو دڵڕفێنییهکانی ژیانی سهرمایهدارانهی کهشی فیلمهکهدا، ئهوه مۆسیقای واگنێره که تێکهڵ دێکۆڕی جلوکهشی فیلمهکه، له سهرهتا شادی دهدا به فیلمهکه و له کۆتایی وێرانی دهدا به شادییهکان. وێنهی ئۆفیلیایی "جاستین"، که یان به دهستهگوڵێکهوه له نێو ئاودا، بهرهو مهرگ و تهواوبوونی دنیا دهچێ یان له خهونی بێئهنجامی بارانی مهلی مردوودا، ڕۆمانتیسیسم بهجێ دێڵێ، مهرگ دهکاته قارهمانی سهرهکی ملانکولیا و به ههموو ئاواتهکان تهنانهت ئاواتی مردنیش سووکایهتی دهکات: کلێر دهڵێ با لهسهر تراس دانیشێن و چاوهڕوانی هاتنی ملانکولیا شهڕاب بخۆینهوه بهڵام جاستین له وهڵامدا دهڵێ: بۆ لهسهر کاسهی مهبال مهحتهلی نهبین؟!
چاوهڕوانییهکان ههر چۆنێک بێ، فۆنتریێر له ئاکامدا، سێ چیلکه دهکاته قهسری فیرعونی قارهمانهکانی و ئاسنێکی بازنهیی منداڵانهش دهبێته گهورهترین چهکی خۆپاراستن؛ تاکوو وهبیرمان بێنێتهوه دایمه ترسێک لهگهڵ بهشهره بۆ ئهوهی ناقارهمانبوونی وهبیر بهێنێتهوه.
ڕۆمانی «داری مار»
سەیدقادر ھیدایەتی
... ورد بوونەوە لە شتە پەڕاوێزی و وردەکان تا ئەو ڕادە زۆر و وردە، لە زور جێگا باڵی زەین و ھێزی خەیاڵی خوێنەر دەبەستێ و ئیمکانی خوێندنەوەیەکەی چالاکی بۆ ناھێڵێ. یانی لەو ڕۆمانەدا وردەکارییەکان تا ڕادەیەک وێنا کراون کە ئەستەمە لایەنی ژێرەوەی دەق یان ئەو شتەی پێی دەکوترێ «سپی خوێنی» بتوانێ پێک بێ...
- "پڕۆلتاریای ههموو دنیا یهککهون!"، بهوپهڕی حورمهتهوه ئیزنه بپرسم- بۆ چی؟
- پێم بڵێ نهتهوهیهک به چی پێدهکهنێ تاکوو پێت بڵێم دهیهوێ خوێنی له پێناو چیدا بڕێژێ؟
- کهسێک که فانتێزی دهزانێ، پێویست ناکا درۆ بکات.
"بریا کاکهسووری" بۆ ئهمن وێنهی زیندووی قهڵافهتی نادیاری ئهدهبیاته. کهمتر کهسێک دهناسم که ئاوا ئاشقانه تێکهڵ کتێب و ئارهزووی نووسینێکی ههتاههتایی بووبێ. کهمتر کهسێک دهناسم که له ئهو پهڕی شهیدایییهوه تهنانهت وهک نهخۆشێکی بێدهرمان به شوێن دهرماندا، وێڵی چیرۆک و نووسین و نووسهران بووبێ. زۆر تانه و تهشهرم وهبیر دێتهوه که بۆ هۆی ئهدهبیاتهوه وهدووی کهوتبێ و ئهویان ڕهنجاندبێ. زۆر ماندوونهبوونیم لهو لهبیره بۆ ئهوهی کۆڕێک یان وێبێک یان کتێبێک، بهرههمی بووبێ. زۆر کتێبی نێو کتێبخانهکهم، بۆ ناساندن و ههڵبژاردنیان، نیشانی ئهویان پێوه دیاره. له کهلێنوکولێنی زۆر وشهی نێو چیرۆکهکانمدا دیاره. کهم شادی و زۆر ڕهنجیم له بیره. له زۆر کتێبخانه، لهمشار و ئهوشار، که خۆمی پێدا دهکهم، جێ ههنگاو و بێدهنگییهکانی وهک ڕازدارێکی ههمیشهیی دووکانهکانم، لهبیر و لا دیاره.
کاتێ من دهستم کرد به نووسین دهتوانم بڵێم ئهو خاوهنی کتێبی خۆی بوو. بوو به ڕهههندێک بۆ من بۆ دیتنهوهی زۆر گۆشهی تهنیاییم. زۆر تووڕهیی و ههڵچوونمی به هۆی ئهدبیاتهوه قهبووڵ کرد. سهبوور بوو له گهڵ شێتیهکانی من؛ منێک که تهنیا بۆنێکی کهمی سیاسهت له ئهدهبیاتدا دهیتۆراندم و زۆر جار تا ئهوپهڕی ئاسمانی ههڵچوون، ههڵی دهبهزاندمهوه. منێک که دایمه دهمبۆڵاند:" کاکه! ساڵهها لهوه پێش بهڵێنی کتێبی دیکهی جگه له " سیاسووت"ت داوه؛ دهی وهختیهتی که کتێب بدهیه دهرێ و لهمولهوێ چوون و سهر له ئهموئهودان خۆت بپارێزی!" زۆر جار دهبوومه کوێخا و باپیرهی دۆستانی گهورهتر له خۆم؛ له هیچ و خۆڕایی! من دهمزانی بریا بێ چیرۆک و ڕۆمان دهمرێ بهڵام ههستی ناسکی پڕ له ڕازی ئهو زۆرجار دانیشتنهکان و ناسینی ئاشقانی ئهدهبیاتی پێ خۆشتر بوو له وهشوێنکهوتنی کارهکانی خۆی.
ئێستا ئهوڕۆژهیه که من به تهواوهتی شادم و دیسان چاوهڕوان. شاد لهوهی که کۆچیرۆکێکی دیکهی ئهو- سهفهرنامهی دۆزهخ- هاتۆته دهرێ و چاوهڕوان بۆ ئهوهی که زۆر نهخایهنێ و ئهو کتێبانهی که من دهزانم تهیاری هاتنه دهرێن، بکهونه بهر دهستی ئاشقانی ئهدبیات.
بریای خۆشهویستی من و ئێمه! من و زۆرکهس له دۆستانی من، ڕهنجهکانی تۆمان بۆ ئاشتبوونهوهمان له گهڵ مهنی ئهدهبیمان، تا ههتایه، ههر له یاده.
یار بە غەیری ڕێ و بێ
ئەی بە قەد عەڕعەڕ، بە بۆ سونبول، بە ڕۆخ چون میم و ھێ
مورغــی دڵ شود حـەبس ئـەنـدەر قەیــدی زێ و لام و فـێ
کـەی تـەوانـەم جـان بــەرەم دەر عـەرەسـەگاھـی ڕەزمی تـۆ
میزەنــەد پــەیپــەی بـە جـانـەم خـێ و نـون و جیـم و ڕێ
...
" دوو کورته باس لهسهر چیرۆکی "تازهترین پهکهجی چوارکاره/ سهید قادر هیدایهتی"
۱- حهمهدهمین شامحهمهدی
گێڕانهوه به شێوهیێکی ڕاستهوخۆ و رێئال دهس پێدهکا و کۆتایی دێت. بهڵام خوێنهر ههست دهکات گرفتێک لهم گێڕانهوهدا ههیه بۆیه به سهرنجێکی زیاترهوه دهردهکهوێ، ڕووداوێکی دهگمهن وای کردووه گومانێک درووست بێ. گومانی سهرههڵدانی سهیالیزهین(زهینه باز). ئاسایییه چون خوێنهر بهردهوام تووشی جێگۆڕکێ له بابهت و وێنه و کات و شوێندا دهبێ و ئهوهش، کهسایهتی، زمان، بۆچوون و بڕوا و...ی جیاواز درووست دهکات.
بهڵام ههر کام لهمانه دهتوانێ مرۆڤ بورووژێنێ و ههڵوێستێکی تایبهتی پێ ببهخشێ و ئهم جوانکاریییه بخولقێنێ که زهینهباز درووستی دهکات. سهیر کهن چهنده سرووشتییه که به کهشوههوایێکی ئهویندارییهوه دهسپێدهکا وا لهگهڵ حهز و هیواکانیان یهکدهگرێتهوه و پاش شاردنهوه یان گوم و گۆڕ کردنی ئهم داوایه، دهچێته سهر گوێدان به ئاوازێکی خهمبار و خوێندنهوهی بڕێ ژێر نووسی بڵحانه که لهوانهیه راستهقینهی دهروونی ئهو کاتهی کهسایهتییهکان بێت. ئهمه نموونهیێکی یهکگرتنهوهی حهزو و هیواکانه لهگهل دیتراوهکان. بهڵام با ئاماژه بهوه بکهین که ههر ئهم ئینسانه دیلانه به دهس ئیشتیاکانیانهوه جارو بار مهجبوورن له ڕوانینی ژنه ئامرازێک ههڵێن و بیر له برینه کولاوهکانیان بکهنهوه که بهردهوام له تهشهنهدان، ئهمهیه که دین، یاسا، ئازادی و دیلییان وهبیر دێتهوه. ڕاستهقینهیێکی زهق زهق له کوشتاری دهسهڵاتداران. بێبڕوایی به بنهماو و کۆڵهکهکانی ڕاوهستاوییان. ههستکردن به دهستهچیله بوون و فهوتان. ئهمانه ههمووی دهگێڕنهوه که ههموو شتێک دهتوانێ له کورتهکاتێکدا ڕوو بدات وهک قرتاندنی دوگمهی کونتڕۆلێک. وهها که دهتوانێ له دنیایێکهوه بتباته دنیایهکی دی و له ژیانهوه بدتباتهوه نهمان و له دیلییهوه بۆ ڕزگاری و لهوێشهوه دیسان بهرهو دیلیت بهرێ.
بهڵام ئهمانه ههمووی وهک تهمێک وان که له دهلاقهی ئیشتیا نگریسهکانیانهوه دهردهکهوێ و گوم دهبێ، ئهوان تهنانهت منداڵهکهشیان له دیلایهتی به مودێڕنیته له کێس داوه بۆ؟ چون حاستی تێگهییشتنی کهسایهتییهکان ناگاته باڵای ئامرازهکان و داماو و زهلیل له یهکتریان نامۆ دهکات. ئهم نامۆ بوونه تامهرزی غهیان دهیانباو و بهڕەڵایان دهکات.
بهڵام ئهم نامۆ بوون و غهیانه له ههموو کردهوهکاندا دهبیندرێ که دیسان له بازبازۆکێنهی کهناڵهکاندا دهبینین. غهیانهتی دهوڵهتهکان. سهرکردهکان، پێاوهکان و باوکهکان و... که ئهمه مهترسیدارترین بریقهێیکه که له زهینیاندا سهرههڵدهدا و ئهوان بههۆی کهڵکهڵهکانیانهوه تێی ناگهن، دیسان سهرگهردانیی مرۆڤ بۆ شتی هیچ و پووچ!
من پێموایه ههر قرته و شاشه و دێڕ و وێنهیێک گهلێک قسه ههڵدهگرێ که لێرهدا ناگونجێ.
له کۆتاییدا پێموایه چیرۆکێکی تازهیه و دهسخۆشی له سهیدقادر دهکهم.
۲- خهونباز
شێوهی ئهم چیرۆکهمان کهم نووسیوه: چاوگێڕان به ژیانی یهک ڕۆژ تێکهڵtv. ژیانی ههموومان به شێوهیهکی گهمژانه تێکهڵ پڕووپاگهندهی بێزارکهرانهی "تولووزێنه"! ههموو ژیانی دهورووبهرمان به چهشنێک دهبینین که "وێنه ڕاستیهکانی" tv نیشانمان دهدهن. ئهو وێنانهی که دهستهکانی نادیار چۆنیان ئیشتیا لێ بێ گهورهی دهکهنهوه یان چکۆله. ئینسانی ئهوڕۆیی ناعیلاجه لهوهی که دهبێ لهزۆر کات دا وهک تهبلیغاتهکانی tv ژیان بباتهسهر. بۆ وێنه له پڕوپاگهندهکاندا هێنده لهسهر یهک باس له کهم وزهیی ههستی جنسی پیاوانه دهکرێ، کابرای چیرۆکمان که مهیلیشی کهمه بۆ ژنهکهی، پهکهیجی چوارکاره دهکڕێ نهکا بهکار بێ! تیڤی و ژورنالیستی نێوی دهستی خستۆته سهر ژیانی ههموومان. ئهمڕۆ، تهنانهت دهبێ وهک تهبلیغی tv خهون ببینی و له گهڵ ژن و منداڵ و کۆمهڵ بدوێی و ڕێگا بڕۆی و بیر بکهیتهوه. بیر کردنهوهکانیش دێته چوارچێوهی ههواڵ و ڕهنگ و فهرمایشی بێزارکهرانهی کاناڵه جۆراوجۆرهکان. ئهخلاق و ڕهحم و سهرمایه دێنه ژێڕ شاڵاوی تهفسیر و تهبلیغهکانهوه. tv ڕهفێقه، ژنه، ماڵه، لهزهته، خهیاڵه ، خانووبهرهیهو هتد. جیهانی فکری ئهم چیرۆکه دهچێته ناخی ژیانی مرۆی ئهم سهردهمه که tv کهس و کار و ئارهزووکانیهتی. ههرچهن کهم واههیه بهینی tv و فکر، نێوانێک ههبێ بهڵام نووسهر توانیویه به ڕهستهی ساکار و کورت دهروازهیهک بکاتهوه بهرهو بیر له ژیانی مرۆ ی ئه مڕۆ.
پیاوەکە ئێوارە بە سێ پاکەتەوە گەڕاوە بۆ ماڵێ. پاکەتی یەکەم سێ کیلۆ میوەی تێکەڵی - سێ دەنک پرتەقاڵ، شەش مۆز، سێ دەنک خەیار و شەش دەنک سێوی سوور و سپی - تێدا بوو. پاکەتی دووھەم خۆی سێ پاکەتی چکۆلەتری تێدا بوو. لە یەکێک لە پاکەتە چکۆلەکاندا نیو کیلۆ تووگوڵەبەڕۆژە و لە یەکیان دووسەد و پەنجا گەڕەم پستە و لەوی دیکەیاندا پاکەتێک پەشمەکی زەعفەرانی تێدا بوو. پاکەتی سێھەم سێ شتی تێدا بوو: چیپسێکی بنەماڵەیی چیتۆز بە تامی بیبار و بەستەیەک بنێشتی ئۆربیت بە تامی کاڵەک و بەستەیەک کە لە سەری نووسرابوو پەکەیجی چوار کارەی ماکسمەن. پاکەتی مێوەکەی بە دەستێک و دوو پاکەتەکەی دیکەی بە دەستەکەی دیکەی ھەڵگرتبوو...
کەڵەشێرەکەی بابم، چیرۆکێکی خۆش
سەیدقادر ھیدایەتی
عەزیز مەحموودپوور دوای کۆمەڵەچیرۆکی «حەشری ڕەنگەکان» و تێپەڕاندنی ئەزموونێکی تایبەت، بەردەوام بە دوای دیتنەوەی دەنگی خۆی و ڕێگایەکی تایبەتی خۆی بووە. بە گشتی دەتوانین بڵێین عەزیز دوای «حەشری ڕەنگەکان»، لە کۆمەڵەچیرۆکی «فەرموون چایەکی گەرم»دا کەمتاکورت بە دوای ڕامکردن و دەستەمۆکردنی گێڕانەوەیەکی چێژبەخشەوە بووە. دوای کۆمەڵەچیرۆکی «فەرموون چایەکی گەرم» چیرۆکەکانی عەزیز زۆر زیاتر بۆ خستنە ڕووی چیرۆکی چێژبەخش چڕ کراونەتەوە. بە سەرنجدان و وردبوونەوە لە ناوەرۆک و داڕشت و فۆرمی چیرۆکەکانی «فەرموون چایەکی گەرم» و بە تایبەت ئەو چیرۆکە تازانەی کە زۆرتر لە ئینتێرنێتدا بڵاو بوونەوە، دەردەکەوێ کە نووسەر بۆ لادان لە چیرۆکی تەماوی و زەینیبوون ھەوڵێکی بەرچاوی داوە...
|
